有用開csl.、1010或者網上行等等香港電訊服務嘅朋友要注意喇，如果你有將The Club嘅積分轉開做Asia Miles里數嘅習慣就要注意喇，因為有關服務會喺11月正式終止，意味住將Club積分轉做Asia Miles里數嘅尾班車會喺10月底開出。不過唔使咁擔心，因為我覺得直接用Club積分會禮品，甚至換機票有時仲抵！
Asia Miles喺9月中宣布，「Club積分轉換為『亞洲萬里通』里數」服務將於2018年11月1日終止。自動積分里數轉換將在2018年10月31日以當日的Club積分結餘進行最後一次的自動轉換，即係如果你用開自動轉換的話，喺10月31日，你每有100 Club積分就會自動轉做100 Asia Miles里數。如果你選擇彈性轉換，就要喺月底前自行申請將Club積分轉換。
如果你真係想將Club積分轉做Asia Miles里數的話，咁就要快啲行動喇，最遲10月31日就要轉！
The Club換機票仲抵 前提要有足夠Club積分
其實Club積分無得轉做Asia Miles里數都唔緊要，因為根本唔抵，1 Club積分只係換到1里，反而用Club積分直接換機票仲抵。例如只需要4,700 Club積分就可以換到中華航空來回台灣經濟客位機票一張，比起轉做Asia Miles里數先換台灣機票要15,000里先換到，平咗接近7成；如果要用返國泰去比較的話，來回曼谷經濟客位只需要6,800 Club積分，比起用Asia Miles里數要用20,000里先換到平咗66%。
不過，儲Club積分嘅途徑，除咗用香港電訊嘅服務之外，暫時都未算好多，而且用Club積分再額外加現金去換機票的話，亦唔係一個抵玩嘅選擇，所以如果儲唔夠Club積分換機票的話，轉埋呢次Asia Miles之後，只可以考慮一下其他禮品喇。